وأنت ماشي في سيناء حاسب رمل سيناء كله دم
من زمان مات لك هنا خال وأب وابن عم
وناس كتير مش معدودين
وجد كان شايل في جيبه سلسلة مكتوب عليها ايه من سورة ياسين
جدتك تدعيله يرجع وهو نفسه في الشهادة
تدعي هي بس هو عمره ما قال أمين
وأنت ماشي في سيناء حاول تفتكر مات فيها مين
وإنت ماشي في سينا إدعي وإحنا وياك نقول أمين
كل شبر في سيناء غالي أرضها ملهاش مثيل
شمسها وضحكة نهارها ونور قمرها في ليل طويل
شوف بساطة أهلها والطبيعة وسحرها أو جمال الجو فيها ولا مية بحرها
النجوم ماس في سماها وشكلها بين الجبال سينا
عين مصر اللي شافت بيها إيه معنى الجمال
رحلة العذرا ويسوع عدوا فيها من هنا في أرضها سيدنا موسى عاش وكلم ربنا
سيناء درة تاج بلدنا ردها لينا جدودنا والنهاردة بقت أمانة لينا ولولاد ولانا
وعد هنصونها بحياتنا جوه قلبنا وفي عينينا عهد من جيلنا وكلمة والتزام واجب علينا
وأنت ماشي في سيناء حاول تفتكر مات فيها مين
وإنت ماشي في سينا إدعي وإحنا وياك نقول أمين
