لبيه لو إن مالي في حياتك نصيب
بقولها وانت وص سنينك وقلها
أنّي أحاول معك أقرب من أقرب قريب
وأبعد من أبعد بعيد للبشر كلها
حاولت لكنها قامت تصيب وتخيب
أمسي على ليتها وأصبح على علها
من يوم صارت أحاسيسك تحضر وتغيب
وأنا أحسب أني محاصرها ومحتلها
لاتدعي بالرومنسيه وبأنك حبيب
روحي وأنا أغلى حبيب لروحك وخلها
نيتك متبينه لو أن صمتك رهيب
قريتها في عيون دمعك يبلها
مشاعرك ليه تجبرها لشي ماهيب
تبغاه وتحدها لدل مهو دلها
ودعني وعطني الفرقا وربي حسيب
واللي بقى لك من الذكرى معك تلها
جاتك من الله توكل وأنت مالك طليب
ما أحلى من الحاجه إليا جت على حلها
أرحل وأنا صدري الكون الفسيح الرحيب
لو أن روحي على لاماك ياملها
ماعاد باقي سوا دمعة حبيب لحبيب
إليا ذكر هلها وإليا سلا هلها
