مين اللي قال اني بعدك تمام
واني فـ غيابك سهل اني اعيش
غلطت وبعادك دا من عمايلي
وبعدك باعيش اللي باقي فـ مافيش
ماكنتش مفكر هاحن وهابوح
وادور عليكي ف قلب الجروح
واقلب ف صورتك واكرر ف سيرتك
حقيقي خسرتك وحقي أنوح
زمانِك نسيتي وقفلتي البيبان
ولو جابوا سيرتي تقولي الجبان
مقدر وفاهمك وحاسس بهمك
وندمي حقيقي عليا يبان
بخاف اني اضمك ف عز الغياب
والاقي ضلوعي بتحضن فـ ريحتك
واخاف الشوارع تشوفني لواحدي
فتاخد وتدي معايا ف سيرتك
ولسه واحشني سلامك كلامك
وحتى ابتسامك وشكل العنين
لكنك تخافي تعيشي فـ دنيا
صاحبها شعوره ما بين البينين
