صفقة عمري
وتحويشة الأيام
فاضل منهم مين
وباقيلي منهم كام
صفر إصحاب باقيين
ع العشره وجدعان
قال وانا فاكر نفسي
كنت ببص لقدام
وقت الهدد لا لقيت سند
ولاحد عون ليا ومدد
كله اكتفي يرد الوفي
قسوه وجحود مالهاش عدد
لا لقيت غريب ولا قريب
يقولي إيدك مش هسيب
حتي اللي كنت بقول عليه
غلبان طلع في الأصل ديب
صحتني الدنيا م النومه
لقيت فوق راسي ١٠٠ شومه
واتاريني حوشت إخلاصي
كله في حصاله مخرومه
قلوب بالغل مسمومه
نفوس مش صافيه محرومه
وقعت وقولت مين يسند
سابوني ماتقومليش قومه
تاجرت بالخسارة
في ناس وقلوب حجاره
سقتهم حلوي كله
وساقوني بحور مراره
لموا جمايلي ف شكاره
ووقفوا ف أول إشاره
وأول مالاقوها خضره
داسوا عليها بجداره
ضاع من عمري سنين
علي غش واوهام
بوفي لبني أدمين
تستاهل الإعدام
بيعاملوني زبون
وببيعوا ليا كلام
وانا من طيبتي بصدق
علي نياتي و خام
ضهري اتسند علي حيط ورق
علي كدابين عمري اتسرق
طلع العشم اكبر غشم
ودرس قاسي لكن فرق
اكبر وجع لما الجدع
ف اعز ناسه يتخدع
ويفيد بأيه خلصت خلاص
العمر ملهوش مرتجع
