طال ليل الغريب وكل طاري طرى له
وذكريات الغريب تصير مثله غريبه
فيه زحمة وجيه وفيه وجه لحاله
قد غلبني وانا قبله ماذقت الغليبه
مرحبا والله انه مرحبا بالرساله
لادعى منه داعي والله اني لا اجيبه
من تعود على طول المساري لحاله
لابدا لازمه ما هو مشاور صحيبه
يكره اللي يقول ان التسرع جهاله
كل ما ناظرت عينه بطبلون جيبه
ماورى الساعتين الا الهنا في وصاله
وصل يبدد ظروف الحياه العصيبه
يا صلاتي على محمد وصحبه واله
كل مابان لي وجه وصوفه عجيبه
واشقر كل مامر الهوى من خلاله
جاب لي نفحة من ريح مسكه وطيبه
اطرق العود لاهب الهوى من شماله
ودك انك شمال منه وانك حبيبه
من جماله علي يعد وصله جماله
وانا مانكرت لافضله ولا انكرت طيبه
احسد شاله اللي كل ماطاح شاله
المصيبه ظنونه في صارت مصيبه
قلت عفري ادنى ما يسبب جفاله
قال والعفري أن حب الاسد وش يريبه
كيف الومه وانا ماخذ غوالي حلاله
وحدة سامح فيها ووحده غصيبه
