عليك من البها شال يدفي متنك البلور
وفوق الشال لك بشت كتب له ربي الضمه
وانا لو كنت انا بشتك وربك يالزهى المنثور
لا اضمك ضمة اللي له سنه ماشافته امه
واشب النار فظلوعي إلين اصير لك تنور
إلين البرد ياروحي يقول شجابني لمه
واخلي ذا الهبايب لك نسانيس تهب سرور
إلين اتصير ذاك اللي شعور البرد ما همه
عسى ليلي ولا يصبح ولا يطلع علي النور
اذا ما كان ذا الامر على شانك انا اتمّه
انا اصف الكواكب لك حبيبي لو تبي بالدور
واذا خاطرك في نجمه ابد ترقالك النجمه
واجيك مكتف ايديني كأني يابعدي مخفور
غرامي فاتح ازراره وقلبي مشمر كمه
وابادر بالغلا اللي بي طمر اخر مدى للسور
واضم اطرافك الخجلا عساها تطول الضمه
