لي حول شهرين والضيقه هي الضيقه
والخاطر اللي أخبره سمح متكدر
من واقعن عشت فيه وصعب تصديقه
مايجعل الضيق ياتي عجل ومبدر
احيانا لخاطرك تحتاج ترويقه
لو ماتنميت معها شاهي مخدر
تحتاج غرو تذوق الشهد من ريقه
غرون تورد معه بالشوق وتصدر
محبة صادقه ماهي بتلفيقه
متبادله والمشاعر تعتبر ندر
والحلم لاصار ماتسعى لتحقيقه
وتحققه وانت متفوق ومتصدر
بعض المحبه لبعض الناس توهيقه
جلمود جا من علو الجال متحدر
يارهيّف القلب حزني منك ماطيقه
على المواصل طلبتك يالغلا بدر
والطف بجسم نحل وامراضه تعيقه
ماهو بحاجة علاج وإبرة مخدر
علاجه انت ودوا القلب ومعاليقه
وتعالج الخاطر اللي كان متكدر
لو يكتب الوقت حظي معك توفيقه
كان اعتزلت البشر لعيونك الخدر
