مانيــب محتاج احد منهم يواسيني
شرفــت مـــن ضيقتي في راس مرقابي
مـرقابي اللــي الى قفيت يدعــيني
يدري ان مردي له ولو كثرو احبابي
الله يسامح غلاه وهقوته فيني
والله يسامح غروره ويش سوى بي
احسن لي العزله اللي تسرق سنيني
ولاعلاقة حداً مايحسب احسابي
راح فـ طريقه وانا الله لايخليني
ان ماردعْه الوفا ماينفع اعتابي
بيحس في قيمة اللي بينه وبيني
وبيعرف وش قيمتي لاطوّل غيابي
اصـلا وش اللـي لقـيته مــن محبيني
واصلا وش اللي لقيت من اكثر اصحابي
كم واحدن طاح من قلبي ومن عيني
وكم واحدن خاب ظني فيه واعجابي
وكم واحدن لاكثر مالي يصافيني
وان قل مالي مـ عاد اقبل على بابي
يدي لامدت وفا ماعاد يمديني
اخشها ياسعد في جيب جلبابي
على كثر مالحقني من معاديني
والله مـ جاني مثل وجعات الاقرابي
اللي يسليني البارح وينسيني
قدهو يضيّق علي ويتلف اعصابي
الناس فيهم بلا ولا البلا فيني
امنين ماجيت اضحي لشخص ضحى بي
